ढीलम ढालम...ई गाड़ी जीवन : ग़ज़ल सन

💤          ।  ग़ज़ल सन  ।            💤

     ढीलम-ढालम कल-पुर्जाक इ
     गाड़ी जीवन।
     अकस्मात रुकि जाइत कतहु
     सवारी जीवन।
                    •
     कोनहुँ टा किछुओ निश्चित न
     मार्ग एकर
     पथ अनन्त  संबलक तुच्छ
     तैयारी जीवन।
                    •
     असल कथा कविता प्रेमक
     पोथी ने गीत
     शोक,दुःख, झगड़ा घृणाक
     अखबारी जीवन।
                     •
     बैसल कोनो बटोहिक थाकल
     तन्द्रा मे
     बीच बाट थिक पोटरी के
     बटमारी जीवन।
                     •
     कम संँ कम भरि गामक छल
     बेसी भरि विश्वक
     आब एखन असकर सबहक
     परिवारी जीवन।
                      •
     राजनीति सँ ल' क' जीवन
     धर्मक सब नऽव
     दास भेल एकेक लोकक
     दरबारी जीवन।
                      •
     किछु निजता नहिं,ओ ममतो
     नहिं जीवन मे रस
     केहन भेल इ तंत्र समाज,
     वेवहारी जीवन।
                      • •
               गंगेश गुंजन
          #उचितवक्ताडेस्क।