भरि दुनियाँ सरकारी अछि : ग़ज़लसन

🌼…………………………….....

    भरि दुनिया सरकारी अछि
    कागज़ फूलक क्यारी अछि।
                 •
    बात विभेदक करब न हम
    मेधा मुदा बिहारी अछि।
                 •
    सऽब सफ़र लय जीवन मे
    विद्या मात्र सवारी अछि।
                  •
    आब एखन अछि वैह धनिक
    जकर पुत्र व्यौपारी अछि।
                  •
    हयत कोनो सुन्दर बस्ती
    भागलपुरक बरारी अछि।
                  •
    उसरल गाम पड़ायल शहर
    टूटल घऽर घरारी अछि।
                 •
    सत पूछी तँ भरि दुनिया
    भिखमंगे कि जुआरी अछि।
                   •
    गीत नाद संन्यासी भेल
    भरि समाज महकारी अछि।
                   •                 
    ई कविता आजुक श्रम केर
    गुंजन जीक दिहाड़ी अछि।
                    •
            गंगेश गुंजन                                     #उचितवक्ताडेस्क।