राजनीति थिक झिक्का तोड़ी। : गजलसन

             | ग़ज़लसन |             
     पार्टी तार्टी घिच्चा तोड़ी।
     ओकरा पकड़ी एकरा छोड़ी।

     शहरी ग़पशप ड्राइंग रूमक
     झूठ आ सत्यक नुक्का चोरी।

     गामक लोकक कठ विवाद संँ
     भोटक दरबज्जा बलजोरी।

     न'व दियादी भेल लोकतंत्र
     एकहु इंच भूमि नहिं छोड़ी।

     रंगमंच पर रूसा फुल्ली
     पर्दा मे  बड़का भैयारी ।

     घोंखथि सब विचार जनतंत्रक
     राजतंत्र सन बजड़ा-बजड़ी।

     सिद्धान्ते लाठी छनि हिनकर  
     बजड़ल बीच सभा मथफोड़ी। 

     लोक बुद्धि सांँझक यथार्थ मे
     नागर बुद्धिक अफरा तफरी।

     जन्मैए जरूर एखनो शिशु
     मरिओ जाइछ नवका सोइरी।
             
     कृषक क्लेश देखि क' पसरल
     होइए  अपने  गला   मचोड़ी।
                       *
                गंगेश गुंजन                                   #उचितवक्ताडेस्क।                                (पुनर्प्रेषित पोस्ट।)