🌺 माय गंगाजल 🌺

          🌺 माय गंगाजल 🌺

हमर एक टा‌ बालसंगी बयस सं कनी बेसी परिपक्व छल। एक बेर कोनो तेहन शुचिता वला संवेदनशील पूजा पाठक अवसर रहैक।ओकरो अचानक उपस्थित होअ' पड़ितैक। प्रथानुसार पूजा मे प्रवेश सं पहिने ओ देह पर छीटै लेल घर मे गंगाजलक बोतल तकलक।नहिं भेटलै।ओम्हर भगवती आंगन सं ताबड़तोड़ बजाहटि भ' रहल छलैक। एम्हर ओकरा गंगाजल बोतल भेटिये नै रहल छलै। बुढ़ा लोकनिक कोप भाजन सं बंचबा लेल कोनो उपाय नहिं सूझय कि तावते मोन मे एक टा युक्ति फुरएलय। पयर-हाथ धो क' कुल्ला तं पहिने कयनहि रहय। गायत्री जपक भंगिमा मे गमछा त'र आंगुर नुकौलक आ आंखि मूनि क' दस बेर जपि लेलक।फुर्ती सं सम्मिलित होअ' पहुंचि गेल।मात्र बुढ़ा वर्गक आंखिये टा सं कोप भाजन भ' क' बांचि गेल।

   अनुष्ठान समाप्त भेला पर हम पुछलियैक- 'अबै मे एतेक देरी किएक भेलौ रे? एको सेकेंड आर जं नहिं आयल रहितहिक तं आइ कोनो दशा नहिं बांकी रहितौ। दादा बड़ जोर तमसायल छलखुन।तों आबि किएक ने रहल छलहीक?' हम पुछलिऐक तं कहलक:

-अरे गंगाजलक बोतले ने भेटैत रहय तं। देह पर सिक्त केने बिना कोना अबितियै रे ? तकैत-तकैत अकच्छ भ' गेलौं। आखिर एक टा बोतल भेटबो कयल तं सुखायल। ओइ में एकहु ठोप गंगाजल नहिं। की करितिऐक।तखन खलिया बोतल देखि क' ईहो भेल जे भरिसक सबटा समाप्त भ' गेलै तं कहां सं भेटत। निरुपाय किछु ने फुराय। बूझ जे विपत्ति भ' गेल।'

-एहना मे एतहि भगवतीए घर आबि जइतें। एत' तं चिनवार पर गंगाजल धयल रहिते छैक।' हम कहलिऐ।

-से दिमाग में आयल तं मुदा लोक हंसैत जे घर मे एक शीशी गंगाजल नहिं रहैत छनि।मायक प्रतिष्ठा पर पड़ितैक। सिमरिया नहाय गेल अछि,बुझले छौक।अपन टोल केहन खिधांस करय वाला लोक सं भरल छौक से तं सोचै। सैह सोचि क' ड'रे ठमकि गेलौं।' ओ बड़ करुणा सं बाजल।

-तखन ? फेर भेटि गेलौ ?' पुछलियैक।

-ओह। कहां भेटल मर्दे।' मित्र कहलक आ मूड़ी निहुंरा लेलक।

-तं बिनु गंगाजल सिक्त केनहि,ओहिना पूजा मे आबि क' बैसि गेलहीक? अशुद्धे देहे ?' पापक अंदेशा सं डेरायल सन हम कनियें जोर सं पुछलियैक।

-नै रे। सरस्वती माय एक टा युक्ति फुरा देलनि।' कहैत ओ उत्कीर्णा भाव सं बिहुंसल।

-से की रे ?' हम उत्सुक होइत पुछलियैक।

-गायत्री जकां आंगुर पर दस बेर 'माय-माय' जपि लेलौं आ दौड़ि क' आबि गेलौं।' कहैत ओ परम प्रफुल्लित भ' गेल।

     दोस्त आब नहिं अछि।आइयो सोचैत छी ओकर ओ बात तं श्रद्धा सं हृदय मे 'माय' आबि आबि जाइए।                                 🌺

    🌺                                              🌺   🌺                                              🌺

                                  गंगेश गुंजन